رسا نیوز ایجنسی کی رپورٹ کے مطابق، سپاہ پاسداران انقلاب اسلامی ایران کے بیان مین آیا ہے کہ اس بات میں کوئی شک نہیں ہے کہ صنعا میں ایک ہزار پانچ سو سے زیادہ سوگواروں پر بمباری کی وجہ سے آل سعود حکومت اپنے زوال کے مزید قریب پہنچ گئی ہے۔
سپاہ پاسداران انقلاب اسلامی ایران نے صنعا پر سعودی عرب کی حالیہ بمباری کو امریکہ، صیہونی حکومت اور آل سعود کی مشترکہ سازش کا نتیجہ قرار دیا ہے۔
سپاہ پاسداران انقلاب اسلامی ایران نے اتوار کے دن جاری کردہ اپنے بیان میں کہا ہے کہ عالم اسلام میں امریکہ کی پالیسیاں مسلمانوں کے اجتماعی اور تدریجی قتل عام کا سبب بنتی جا رہی ہیں۔
سپاہ پاسداران انقلاب اسلامی کے بیان میں افغانستان، عراق، لبنان، فلسطین، شام، لیبیا، بحرین، سانحہ منی و مکہ اور یمن میں وائٹ ہاؤس کے ہاتھوں انجام پانے والے مظالم کی جانب اشارہ کیا گیا ہے۔
بیان میں آیا ہے کہ تقریبا ڈیڑھ برس سے ظالم آل سعود حکومت، اسلامی دنیا میں اپنی شکستوں کے ازالے کے لئے یمن کے مظلوم اور مسلمان عوام اور ان کے ساتھ شام اور عراق کے مسلمانوں کا قتل عام کر رہی ہے اور اس بات میں کوئی شک نہیں ہے کہ صنعا میں ایک ہزار پانچ سو سے زیادہ سوگواروں پر بمباری کی وجہ سے آل سعود حکومت اپنے زوال کے مزید قریب پہنچ گئی ہے۔/۹۸۸/ن۸۳۰/ک۲۷۹