رسا نیوز ایجنسی کی رپورٹ کے مطابق ترک ذرائع ابلاغ نے خبر دی ہے کہ سرکاری گزٹ میں جاری ایک حکم کے تحت ترک مسلح افواج، جینڈرمری جنرل کمانڈ اور کوسٹ گارڈ کمانڈ کے تحت خدمات انجام دینے والی سولین خواتین دیگر ریاستی اداروں کے ڈریس کوڈ کی پاسداری کریں گی جس میں انہیں اسکارف پہننے کی اجازت دی گئی ہے۔
نئے حکم کے مطابق فوجی اداروں کے لیے خدمات انجام دینے والے مردوں کے داڑھی رکھنے پر پابندی کو ختم کردیا گیا ہے اور انہیں موسم گرما کے دوران ٹائی پہننے یا نہ پہننے کا اختیار دے دیا گیا ہے۔
ترکی حکمراں جماعت نے سن دوہزار گیارہ کے اوائل میں یونیورسٹیوں میں حجاب سے پابندی ہٹائی تھی جبکہ سن دوہزار تیرہ میں سرکاری اور نیم سرکاری اداروں کی خواتین ملازمین کو حجاب کی اجازت دے دی گئی تھی۔
قابل ذکر ہے کہ ترکی میں سن انیس سو تیئس میں ملک کو سیکولر بنانے کی غرض سے خواتین کے حجاب پہننے اور مردوں کے داڑھی رکھنے پر پابندی لگائی گئی تھی جو نوے برس تک جاری رہی۔/۹۸۹/ف۹۴۰/