رسا نیوز ایجنسی کی رپورٹ کے مطابق پاکستان سنی تحریک کے سربراہ محمد ثروت اعجاز قادری نے کہا ہے کہ سیدنا امام حسینؑ دین کی بقاء اور اسلامی اقدار کا تحفظ ہیں، تمام مظالم سہہ کر امام حسینؑ اور محمد مصطفیٰ ﷺ کے خانوادہ نے دین محمدی کو تحریف یزیدیت سے بچایا، آزادی، تحفظ شریعت، احترام آدمیت، بیداری، زندگی، زبردستوں کو زیر کرنے کا پیغام حسین ہے، ظالم، فاجر اور دین میں بگاڑ پیدا کرنیوالے یزید کے خلاف ڈٹ جانا ہی حسینیت ہے، کشمیر کے مظلوم مسلمان آزادی اور حقوق کیلئے سیدنا امام حسینؑ کے نقش قدم پر گامزن ہیں، جو قومیں حق کیلئے آواز بلند نہیں کرتیں یا حق کا ساتھ نہیں دیتی، ان کا شمار بھی یزید کے ساتھ کیا جاتا ہے۔
ثروت اعجاز قادری نے کہا کہ امام حسینؑ کی قربانی ایمان کی صداقتوں کو سب سے بڑا خراج عقیدت ہے۔ انہوں نے کہا کہ سیدنا امام حسینؑ نے لازوال قربانی دیکر ظالموں سے ٹکرانے اور ڈکٹیٹروں پر چھا جانے کا حوصلہ عطا کیا۔
ثروت اعجاز قادری نے کہا کہ اسلام کے خلاف انگلی اٹھانے والے دہشتگرد یزید کے پیروکار ہیں، دہشتگردوں کا مقابلہ حسینی جذبے سے سرشار ہو کر کرینگے، باطل کے سامنے حق ڈٹ جاتا ہے اور ہمیشہ فتح حق کی ہوئی ہے۔ انہوں نے کہا کہ 65 ہزار پاکستانیوں کو دہشتگردی کا ایندھن بنانے والے یزید کے پیروکار ہمیں ختم تو کر سکتے ہیں، مگر ہمارے دلوں سے اہلبیتؑ کی محبت نہیں نکال سکتے، سیدنا امام حسینؑ کے غلام ناموس رسالت کے تحفظ کیلئے حسینی تلوار ہیں۔
انہوں نے کہا کہ بھارت مسلمانوں پر مظالم اور قتل بند کر دے، حسینیت کے پیرکار مودی سمیت بھارت کا شیرازہ بکھیر دینگے۔ انہوں نے مزید کہا کہ سیدنا امام حسینؑ صبر و استقامت اور برداشت کے پیکر تھے، ظالم کے سامنے ڈٹ جانے کیلئے حسینی فکر کو اجاگر کرنے کی ضرورت ہے۔/۹۸۸/ن۹۴۰/