رسا نیوز ایجنسی کی رپورٹ کے مطابق، حکومت ایران کے ترجمان محمد باقر نوبخت نے تہران میں صحافیوں سے بات چیت کرتے ہوئے کہا کہ سعودی عرب نے اگر اپنی دھمکیوں کو عملی جامہ پہنانے کی کوشش کی تو ایران ایسا جواب دےگا کہ سعودیوں کو اپنے کیے پر پیشمان ہونا پڑے گا۔
سعودی عرب کے ناتجربہ کار وزیر جنگ اور نائب ولی عہد محمد بن سلمان نے دو مئی کو اپنے ایک انٹرویو میں دعوی کیا تھا کہ ان کا ملک اپنی سرحدوں کے قریب ہونے والی جنگ کو ایران کے اندر منتقل کردے گا۔حکومت ایران کے ترجمان نے خطے میں سعودی عرب کے غیر دانشمندانہ اور کشیدگی پیدا کرنے والے اقدامات کی جانب اشارہ کرتے ہوئے کہا کہ سعودی عرب نے عراق، شام اور یمن میں تخریبی کردار ادا کرکے، اپنے ہاتھ مسلمانوں کے خون سے آلودہ کرلیے ہیں۔
محمد باقر نوبخت نے کہا کہ سعودی حکام خطے میں اپنی پالیسیوں کی ناکامی پر بوکھلا کر ایران کے خلاف بیہودہ بیان دے رہے ہیں جس کا جواب وزارت خارجہ اور دفاع کی جانب سے دیا جاچکا ہے۔
ایران کے وزیر دفاع محمد حسین دھقان نے سعودی عرب کے وزیرجنگ کے بیان پر ردعمل ظاہر کرتے ہوئے کہا تھا کہ اگر سعودی حکومت نے ایران کے خلاف بیوقوفی کا ارتکاب کیا تو مقدس شہروں مکہ و مدینہ کے سوا سعودی عرب کا کوئی بھی شہر محفوظ نہیں رہے گا۔