مجلس وحدت مسلمین پاکستان کے مرکزی ڈپٹی سیکرٹری جنرل نے کہا ہے کہ پُرامن معاشرے کے قیام کو یقینی بنانے کے لیے مذہبی ہم آہنگی اور باہمی احترام وقت کی اہم ضرورت ہے۔ رسا نیوز ایجنسی کی رپورٹ کے مطابق مجلس وحدت مسلمین پاکستان کے مرکزی ڈپٹی سیکرٹری جنرل حجت الاسلام احمد اقبال رضوی نے کہا ہے کہ پُرامن معاشرے کے قیام کو یقینی بنانے کے لیے مذہبی ہم آہنگی اور باہمی احترام وقت کی اہم ضرورت ہے۔
انہون نے وضاحت کرتے ہوئے کہا کہ تمام مسالک کے علماء کو اتحاد بین المسلمین کی ضرورت و اہمیت پر زور دینا ہوگا۔
اپنے ایک بیان میں ان کا کہنا تھا کہ کسی کے مقدسات کی توہین یا کسی بھی مسلک کی تکفیر اسلام دشمن قوتیں کی وہ شاطرانہ چالیں ہیں جن کے ذریعے امت مسلمہ کو ایک دوسرے کے خلاف صف آرا کر کے کمزور کیا جا رہا ہے۔ ہمیں ان سازشوں سے ہوشیار رہنا ہو گا۔
انہوں نے کہا کہ ففتھ جنریشن وار سوشل میڈیا پر لڑی جانے والی وہ جنگ ہے جس کاہدف صرف اور صرف امت مسلمہ ہے۔ مسلمانوں کو آپس میں لڑانے کے لیے دشمن انتہائی منظم اور پُر حکمت انداز میں شرانگیزی میں مصروف ہے۔
علامہ احمد اقبال رضوی کا مزید کہنا تھا کہ ان سازشوں کا بروقت درک نہ کیا گیا تو عالم اسلام کی بقا کو سنگین خطرات سے دوچار ہونا پڑے گا۔ تمام مسالک کے علماء و خطباء پر یہ شرعی ذمہ داری ہوتی ہے کہ وہ اپنے منبروں سے اتحاد و اخوت کا درس دیں۔
حجت الاسلام احمد اقبال رضوی نے کہا کہ یہ وقت اختلافات پر الجھنے کا نہیں بلکہ مشترکات پر باہم ہونے کا ہے۔ مسلمانوں کے درمیان تفرقہ اور نفاق پھیلانے والے قومی سلامتی کے دشمن ہیں اور اسلام مخالف قوتوں کی تقویت کا باعث ہیں۔