رسا نیوز ایجنسی کی رپورٹ کے مطابق، امامیہ اسٹوڈنٹس آرگنائزیشن پاکستان کے مرکزی نائب صدر علی کاظمی نے مرکزی ٖفنانس سیکرٹری میثم جعفری اور پشاور ڈویژن کے عہدیداران کے ہمراہ پاراچنار کا دورہ کیا، جہاں انہوں نے حالیہ بم دھماکے میں زخمی ہونے والوں کی عیادت کی اور خانوادگان شہداء کے گھروں میں جا کر تعزیت پیش کی۔
اس موقع پر خانوادگان شہداء سے خطاب میں ان کا کہنا تھا کہ دکھ اور غم کے اس عالم میں ہم برابر کے شریک ہیں، شہداء کا خون نا حق رائیگاں نہیں جائے گا اور شہداء کا مشن جاری رکھیں گے۔
انہوں نے اس موقع پر شہداء کی قبروں پر حاضری دی اور مختلف یونٹس کے دورے بھی کئے۔ وفد نے ملک بھر میں جاری اہل تشیع کے قتل عام پر گہرے دکھ اور افسوس کا اظہار کرتے ہوئے کہا کہ ملک بھر میں اہل تشیع کا قتل عام ہو رہا ہے اور رواں سال کے ایک مہینے سے کم عرصے میں ملک بھر میں ۳۰ سے زیادہ بے گناہ شیعہ افراد کا قتل لمحہ فکریہ ہے، حکومت اور سکیورٹی ادارے نیشنل ایکشن پلان کے نام پر عوام کو دھوکہ دینے کی بجائے عملی اقدامات اٹھائیں اور ملک دشمن عناصر کے خلاف کارروائی کرتے ہوئے محب وطن شہریوں کو تخفظ فراہم کرنے میں اپنا کردار ادا کریں۔ /۹۸۸/ ن۹۴۰