رسا نیوز ایجنسی کی رپورٹ کے مطابق، 5 فروری یوم یکجہتی کشمیر کے حوالے سے ملک بھر کی طرح پشاور یونیورسٹی سے بھی کشمیریوں سے اظہار یکجہتی کیلئے امامیہ اسٹوڈنٹس آرگنائزیشن پاکستان پشاور ڈویژن کی جانب سے احتجاجی ریلی کا انعقاد کیا گیا۔
ریلی میں موجود شرکاء نے ہاتھوں میں پلے کارڈز اور پینافلیکس اُٹھا رکھے تھے، جس میں کشمیر کی آزادی کے حوالے سے نعرے درج تھے۔ ریلی پشاور یونیورسٹی زیرو پوائنٹ سے ہوتے ہوئے فٹبال گراونڈ تک پہنچی۔
ڈویژنل صدر کاشف لودھی نے ریلی کے شرکاء سے خطاب کرتے ہوئے کہا کہ کشمیر کا مسئلہ انسانیت کا مسئلہ ہے اور اس مسئلے کو حل کرنے کیلئے ہم بحیثیت پاکستانی قوم مل کر میدان عمل میں کھڑے ہیں اور اس حوالے سے تمام تر قربانیاں دینے کیلئے تیار ہیں۔ انہوں نے کہا کہ وہ وقت دور نہیں جب ہندوستان کا ناپاک سایہ کشمیر کی سرزمین سے ہمیشہ کیلئے ختم ہو جائے گا۔ /۹۸۸/ن۹۴۰