رسا نیوز ایجنسی کی رپورٹ کے مطابق مجلس وحدت مسلمین پنجاب کے ڈپٹی سیکرٹری جنرل ڈاکٹر افتخار نقوی نے 6اگست کو اسلام آباد میں منعقدہ ،،مہدیؑ برحق کانفرنس ،، کے رابطہ مہم کے سلسلے میں جاری اجلاس سے خطاب کرتے ہوئے کہا : ظالم کیخلاف ہر مظلوم کی حمایت ہمارے ایمان کا حصہ ہے، سانحہ ماڈل ٹاوُن کے شہداء کے لہو کو رائیگان نہیں جانے دینگے،
انہوں نے تاکید کی : ہمارے شہداء کے قاتلوں کے سہولت کار پنجاب حکومت کی صفوں میں بیٹھے ہیں، پنجاب میں ہمارے درجنوں بے گناہ شہداء کے لواحقین انصاف کے منتظرہیں،ن لیگ میں شامل دہشتگردوں کے سہولت کار ہمارے خلاف انتقامی کاروائیوں میں مصروف ہیں ۔
انہوں نے بیان کیا : پنجاب میں سی ٹی ڈی کے ذریعے حکومت ملت جعفریہ کے بے گناہ افراد کو ہراساں کرنے میں مصروف ہے،ہم بانیان پاکستان کی اولاد ہیں، ملک دشمنوں کیخلاف خون کے آخری قطرے تک جدو جہد جاری رکھیں گے، اسلام آباد میں 6 اگست کو ہونے والا اجتماع دہشتگردی اور کرپشن زدہ حکمرانوں کیخلاف ریفرنڈم ثابت ہوگا۔
انہوں نے کہا : حکمران جماعت اپنے کرپشن چھپانے کے لئے عدلیہ اور قومی سلامتی کے اداروں کے خلاف ہرزہ سرائی میں مصروف ہے،ہم آل شریف کو سیاسی شہید بننے نہیں دینگے، ملکی وسائل لوٹنے والو ں کو پائی پائی کا حساب دینا ہو گا،نواز شریف اور شہبازشریف حق حکمرانی کھو چکے ہیں،عوام ان کرپٹ اور ملک دشمن حکمرانوں کیخلاف باہر نکلیں۔
انہوں نے بیان کیا : پاکستان کی سالمیت اور بقا کے لئے ضروری ہے کہ ان کرپٹ حکمرانوں کو انصاف کے کٹہرے میں کھڑا کیا جائے۔/۹۸۹/ف۹۴۰/