رسا نیوز ایجنسی کی رپورٹ کے مطابق پاکستان کے شہر کراچی میں پولیس اور حساس ادارے کے اہلکاروں نے کارروائی کرتے ہوئے جامعہ کراچی کی اسٹاف کالونی سے وہابی دہشت گرد تنظیم انصار الشریعہ کے 3 دہشت گردوں کو گرفتار کرلیا ہے۔
اطلاعات کے مطابق ایم کیو ایم پاکستان کے رہنما اور سندھ اسمبلی میں اپوزیشن لیڈر خواجہ اظہار پر قاتلانہ حملے کے بعد قانون نافذ کرنے والے اداروں نے دہشت گردوں کے گرد گھیرا تنگ کردیا ہے اور اب تک متعدد افراد کو گرفتار کیا جاچکا ہے۔
قانون نافذ کرنے والے اداروں نے خواجہ اظہار پر حملہ میں ملوث وہابی دہشت گرد اور کالعدم انصار الشریعہ سے تعلق رکھنے والے عبدالکریم سروش صدیقی کو اس کے 3 ساتھیوں سمیت گرفتار کیا تھا جو جامعہ کراچی کے طالب علم تھے جس کے بعد فورسز نے جامعہ کراچی کی مسلسل نگرانی شروع کردی تھی اور جامعہ کے طلبا کا ریکارڈ خفیہ اداروں کو دینے کا فیصلہ کیا تھا جب کہ جامعہ کراچی کی اسٹاف کالونی سے لیکچرار کو ان کے بیٹے سمیت گرفتار کیا گیا تھا۔
ذرائع کے مطابق سیکیورٹی اداروں نے پہلے سے گرفتار ملزمان کی نشاندہی پر ایک بار پھر جامعہ کراچی میں کارروائی کرتے ہوئے مبینہ طور پر انصارالشریعہ کے 3 مزید دہشت گردوں کو گرفتار کرلیا ہے جن کے قبضے سے اسلحہ، موبائل فون اور لیپ ٹاپ برآمد کرلیا گیا ہے۔
ذرائع کا کہنا ہے کہ عبدالکریم سروش صدیقی کے پیچھے کوئی بڑا ماسٹر مائنڈ ہے ملزم کے دیگر دوستوں کے بارے میں معلومات حاصل کی جارہی ہے۔/۹۸۹/ف۹۴۰/