رسا نیوز ایجنسی کی رپورٹ کے مطابق سعودی عرب کے لڑاکا طیاروں نے یمن کے صوبہ ذمار کے شہر الحدا میں ایک گاڑی کو نشانہ بنایا جس کے نتیجے میں کم از کم پانچ یمنی شہری شہید اور چھ زخمی ہوگئے ہیں۔
سعودی عرب کے لڑاکا طیاروں نے الحدا شہر کے الاحساء علاقے میں ایک مواصلاتی راستے پر بھی بمباری کی جس کے نتیجے میں پانچ افراد زخمی ہوگئے ہیں۔
یمن کے دارالحکومت صنعا کے ذہبان علاقے میں ایک بازار پر سعودی عرب کے جیٹ طیاروں کے حملے میں پانچ یمنی شہری شہید ہوئے ہیں۔
دریں اثناء یمن کے صوبہ صعدہ کے شہر سحار میں واقع اخماس علاقے میں سعودی عرب کے فضائی حملوں کے دوران گرایا جانے والا ایک کلسٹر بم پھٹ گیا ہے جس کے نتیجے میں کم از کم پانچ یمنی بچے شہید ہوگئے ہیں۔
سعودی عرب کے لڑاکا طیاروں نے سحار شہر میں رہائشی مکانات کو بھی اپنے حملوں کا نشانہ بنایا ہے۔ ان حملوں میں ایک خاتون شہید اور دو افراد زخمی ہوگئے ہیں۔
قابل ذکر ہے کہ آل سعود حکومت نے یمن کے مفرور اور مستعفی صدر عبدربہ منصور ہادی کو دوبارہ اقتدار میں لانے اور عوامی تحریک انصاراللہ کو کمزور کرنے کے مقصد سے یمن کے خلاف جنگ شروع کر رکھی ہے۔
واضح رہے کہ آل سعود نے اس غیر مساوی جنگ میں کلسٹر بم جیسے ممنوعہ ہتھیار بھی استعمال کئے ہیں۔ یمنی ذرائع کے مطابق اس جنگ میں یمن کے اب تک تقریبا دس ہزار افراد شہید ہو چکے ہیں۔