رسا نیوز ایجنسی کی رپورٹ کے مطابق، فلپائن میں تعینات اسلامی جمہوریہ ایران کے سفیر «محمد تنهایی» نے ارنا سے گفتگو کرتے ہوئے فلپائن کو مشرق بعید میں ایران کا پارٹنر قرار دیا اور یہ امید ظاہر کی کہ رودریگو دوترتے کے چھے سالہ دور صدارت میں دونوں ممالک کے درمیان تعلقات پہلے سے زیادہ فروغ پائیں گے۔
محمد تنهایی نے تاکید کے ساتھ کہا کہ فلپائن کی بعض کمپنیوں نے ایران میں بلاواسطہ سرمایہ کاری کے لیے آمادگی ظاہر کی ہے اور دوطرفہ تعلقات کے فروغ کے لیے راستہ ہموار ہے۔
منیلا میں تعینات ایران کے سفیر نے کہا کہ حالیہ چند سالوں کے دوران فلپائن کی اقتصادی ترقی کی شرح 7 فیصد رہی ہے جس کے نتیجے میں دونوں ممالک کے تاجروں کے لیے سرمایہ کاری اور دوطرفہ تجارت کے لیے اچھے موقع پیدا کیے گئے ہیں۔
انہوں نے مزید کہا کہ فلپائن کو تیل اور گیس کی فراہمی کے لیے معتبر اور مستحکم ذرائع کی ضرورت ہے اور اس موضوع کو دونوں ممالک کے طویل المیعاد اور اسٹریٹیجک تعلقات کے فروغ کے سلسلے میں خاص اہمیت حاصل ہے۔
فلپائن میں تعینات اسلامی جمہوریہ ایران کے سفیر نے تاکید کے ساتھ کہا کہ ایران اور فلپائن کے درمیان مضبوط اور گہرے تجارتی تعلقات سے دونوں ممالک کے مفادات محفوظ رہیں گے۔/۹۸۸/ن۹۴۰