رسا نیوز ایجنسی کی رپورٹ کے مطابق مجلس وحدت مسلمین پاکستان صوبہ سندہ کے سیکریٹری جنرل حجت الاسلام مقصود علی ڈومکی نے پریس کانفرنس سے خطاب کرتے ہوئے کہا ہے کہ بے گناہ اسیروں کی رہائی کے لئے جیل بھرو تحریک ضرور کامیاب ہوگی، کیونکہ فتح ہمیشہ حق کی ہوتی ہے۔
انہوں نے بیان کیا : ماورائے آئین اور قانون اقدامات سے معاشرے میں انتشار پھیلتا ہے جبکہ ریاستی اداروں کو چاہیئے کہ وہ مہذب معاشرے کے قیام کے لئے خود کو آئین اور قانون کا پابند بنائیں۔ مسنگ پرسنس کا معاملہ آئین اور قانون کے مطابق حل کیا جائے۔
انہوں نے کہا : سندہ سمیت ملک بھر میں سینکڑوں کارکن جیل بھرو تحریک کے لئے آمادہ ہیں۔ گورنمنٹ اپنی ذمہ داری کو سمجھتے ہوئے مسئلے کو جلد حل کرے بصورت دیگر ضلعی سطح تک جیل بھرو تحریک کا آغاز ہوگا۔
انہوں نے کہا کہ ملت جعفریہ محب وطن اور پرامن قوم ہے جس نے ہمیشہ امن و محبت کا پیغام دیا ہے، سینکڑوں شہداء کے جنازے اٹھا کر بھی ملکی سالمیت اور وقار کے منافی کوئی اقدام نہیں کیا۔ ایسی مہذب قوم کو اغیار کی خوشنودی کے لئے ظالمانہ بیلنس پالیسی کے تحت رگڑنا انتہائی غیر منصفانہ اقدام ہے۔
انہوں نے جیل بھرو تحریک کے سلسلے میں اصغریہ آرگنائزیشن پاکستان کے مرکزی صدر برادر فضل حسین اصغری اور اے ایس او کے صدر برادر حبدار علی سے جیل بھرو تحریک اور شیعہ مسنگ پرسنز کے اشو پر ملت جعفریہ کی مشترکہ جدوجہد پر مشاورت کی اور کہا کہ اس تحریک میں ملت جعفریہ کی تمام تنظیمیں، شخصیات اور علمائے کرام اتحاد کا مظاہرہ کرتے ہوئے ملی اھداف کا حصول یقینی بنائیں گے۔/۹۸۹/ف۹۴۰/