رسا نیوز ایجنسی کی رپورٹ کے مطابق سعودی عرب کے ظالم وزیر دفاع شہزادہ محمد بن سلمان پاکستان کے مختصر دورے کے بعد وطن واپس روانہ ہوگئے ہیں۔
اس سے قبل سعودی وزیر دفاع شہزادہ محمد بن سلمان نے وزیراعظم نواز شریف سے اسلام آباد میں ملاقات کی۔ جس میں مسلح افواج کے سربراہ، وفاقی وزراء اور ارکان پارلیمنٹ بھی موجود تھے۔
اس ملاقات میں پاک سعودی عرب تعلقات، مشرق وسطٰی کی صورتحال اور باہمی دلچسبی کے اموار پر تبادلہ خیال کیا گیا۔
وزیراعظم نواز شریف نے بیان کیا : پاکستان اور سعودی عرب میں گہرے دوستانہ تعلقات ہیں اور دونوں ممالک کی دوستی ہر آزمائش پر پوری اتری ہے۔
انہوں نے کہا : سعودی عرب کی سلامتی کو کوئی خطرہ لاحق ہوا تو پاکستان سعودی عرب کے ساتھ کھڑا ہے۔
سعودی وزیر دفاع شہزادہ محمد بن سلمان نے بیان کیا : پاکستان خطے کا اہم ملک ہے۔ دونوں ملکوں کے درمیان دوستی وقت کے ساتھ مزید مضبوط ہوتی جا رہی ہے۔
انہوں نے اپنی قیادت کی جانب سے نیک خواہشات کا پیغام وزیراعظم نواز شریف تک پہنچایا۔
ملاقات کے بعد جاری اعلامیے میں کہا گیا کہ وزیراعظم نواز شریف اور سعودی وزیر دفاع کے درمیان ملاقات میں مختلف شعبوں میں باہمی تعاون بڑھانے پر بھی اتفاق کیا گیا۔
آئی ایس پی آر کے مطابق سعودی وزیر دفاع شہزادہ محمد بن سلمان نے چیف آف آرمی سٹاف سے بھی ملاقات کی۔ اس دوران علاقائی سکیورٹی، خاص طور پر مشرق وسطٰی کے معاملات زیر بحث آئے۔
ملاقات میں دفاعی اور باہمی تعلقات پر بھی گفتگو ہوئی۔ سعودی وزیر دفاع مختصر دورے کے بعد وطن روانہ ہوگئے۔ وفاقی وزیر دفاع خواجہ آصف اور آرمی چیف جنرل راحیل شریف نے انہیں رخصت کیا۔