رسا نیوز ایجنسی کی رپورٹ کے مطابق مجلس وحدت مسلمین پاکستان کے مرکزی سیکرٹری جنرل حجت الاسلام راجہ ناصر عباس جعفری نے کہا ہے کہ نواز شریف اور اہل خانہ کا نیب کا سامنے پیشی سے انکار ملک کے آئین و قانون کی توہین ہے۔
انہوں نے وضاحت کی : ریاستی اداروں کو نااہل وزیر اعظم کی طرف سے مسلسل تضحیک کا نشانہ بنایا جا رہا ہے۔فرد واحد کا خود کو ملکی قوانین سے بالا سمجھنا ایک نفسیاتی عارضہ اور رعونت کے سوا کچھ نہیں۔یہ گھمنڈ نواز شریف کو لے ڈوبے گا۔
انہوں نے کہا کہ جے آئی ٹی رپورٹ کی روشنی میں سپریم کورٹ کے پانچوں جج صاحبان نے مشترکہ طور پر سابق وزیر اعظم کے خلاف فیصلہ دیا۔ نیب کے پاس نواز شریف اور ان کے خاندان سے پوچھ گچھ کے مکمل اختیارات ہیں جنہیں چیلنج نہیں کیا جا سکتا۔
انہوں نے بیان کیا : وزیر اعظم کے منصب سے نا اہل ہونے کے بعد بھی جوشخص قانون شکنی میں اتنی دیدہ دلیری کا مظاہرہ کرتا ہے جب وہ صاحب اقتدار تھا تب اس کی صورتحال کیا ہوئی ہو گی پوری قوم کو اس کا بخوبی اندازہ ہو گیا ہو گا۔
انہوں نے کہا وطن عزیز کو عدم استحکام کا شکار کرنے کی بنیادی وجہ نا اہل حکمرانوں کی بد انتظامی رہی ہے۔ حکمرانوں کے فیصلوں اور پالیسیوں سے قوم کی بجائے کمیشن ایجنٹ سے مستفید ہوتے رہے۔ملکی ترقی کے نام پر بڑے بڑے منصوبوں کے ٹھیکے من پسند لوگوں کو دیے گئے تاہم صحت، تعلیم اور توانائی جیسی بنیادی ضروریات زندگی میں بہتری کی بجائے ابتری آتی رہی۔ جب تک ایوان اقتدار کو ان کے نرغے سے آزاد نہیں کرا لیا جا تا تب تک وطن عزیز کا ترقی و استحکام کی طرف بڑھنا ممکن نہیں۔وطن فروش سیاستدانوں سے مارد وطن کو آزاد کرانے کے لیے قوم کا ہر فرد اپنا کردار ادا کرے۔/۹۸۸/ن۹۴۰/