رسا نیوز ایجنسی کی رپورٹ کے مطابق، ترجمان دفترخارجہ بہرام قاسمی نے صحافیوں سے گفتگو کرتے ہوئے کہا کہ اسلامی جمہوریہ ایران اسلامی تعاون تنظیم کے وزرائے خارجہ اور سربراہی اجلاس میں منظور ہونے والے بعض فیصلوں پر کہا کہ ایران فلسطینی قوم کے ناقابل انکار حقوق کی بھرپور حمایت کرتا ہے تاہم اس کا ہرگز یہ مطلب نہیں ہے کہ ایران، اسرائیل کی غاصب اور جعلی حکومت کو تسلیم کرتا ہے۔
انہوں نے مزید کہا کہ استنبول اجلاس میں اسلامی جمہوریہ ایران نے قابض صیہونی ریاست کو تسلیم نہ کرنے کے حوالے سے اپنے مؤقف کا اعلان کیا اور اس حوالے سے تنظیم کے سیکرٹریٹ کو بھی باضابطہ طور پر آگاہ کردیا ہے۔
یاد رہے کہ اسلامی تعاون تنظیم کے ہنگامی اجلاس میں او آئی سی نے بیت المقدس کو فلسطین کا دارالحکومت اعلان کردیا۔
واضح رہے کہ امریکی صدر ٹرمپ کی جانب سے بیت المقدس کو اسرائیل کے دارالحکومت کے طور پر تسلیم کرنے کے فیصلے پر او آئی سی کا ہنگامی سربراہی اجلاس ترکی شہر استنبول میں ہوا جس میں ایران کے صدر سمیت او آئی سی کے رکن ممالک کے 57 نمائندوں اعلی حکام اور سربراہان مملکت نے شرکت کی۔ /۹۸۸/ ن۹۴۰