رسا نیوز ایجنسی کی رپورٹ کے مطابق سنی اتحاد کونسل پاکستان کے چیئرمین صاحبزادہ حامد رضا نے جامعہ رضویہ فیصل آباد میں پیغام حسینؑ کانفرنس سے خطاب کرتے ہوئے کہا ہے کہ حسینیت اور یزیدیت کی جنگ آج بھی جاری ہے، امریکہ عہد حاضر کی یزیدی قوتوں کا سرغنہ ہے۔
انہوں نے وضاحات کی : پیغام حسینؑ کو سمجھنے، اپنانے اور پھیلانے کی ضرورت ہے، سانحہ کربلا سے طاغوتی طاقتوں کیخلاف جدوجہد کا درس ملتا ہے، اہل حق کیلئے حسینی فکر مشعل راہ ہے، خاندان رسول(ص) کیساتھ والہانہ محبت ایمان کی بنیاد ہے، حضرت امام حسینؑ جرات و استقامت اور حریت و عزیمت کا استعارہ ہیں۔
صاحبزادہ حامد رضا نے مزید کہا کہ شہدائے کربلا کی لازوال قربانیاں تاریخ اسلام کا روشن باب ہے۔ فاسق و فاجر حکمرانوں کی مزاحمت کرنا درس کربلا ہے۔
انہوں نے کہا کہ حسینیت حق اور یزیدیت باطل کا نام ہے، محرم کے ایام میں وحدت امت کا پیغام عام کرنے کی ضرورت ہے، تمام مکاتب فکر کے علماء بین المسالک ہم آہنگی کیلئے اپنا کردار ادا کریں، حکومت محرم کے دوران سیکورٹی کے فُول پروف انتظامات کرے۔
سنی اتحاد کونسل پاکستان کے چیئرمین نے کہا کہ منبر و محراب سے نفرت نہیں محبت کا پیغام دیا جائے۔ حسینیت کا پرچم تا قیامت سر بلند رہے گا۔ اہل حق حسینی جذبے سے سرشار ہو کر ہر دور کی یزیدی قوتوں کی مزاحمت جاری رکھیں گے۔ سانحہ کربلا کے تذکرے سے دلوں میں شوق شہادت بیدار ہوتا ہے۔
صاحبزادہ حامد رضا نے کہا کہ استعماری طاقتوں کی سرکوبی کیلئے حسینی فکر کو مشعل راہ بنانا ہو گا۔ نواسہ رسول نے سر کٹوا کر حفاظت دین کا حق ادا کر دیا۔ ہر سچا مسلمان شہدائے کربلا سے محبت و عقیدت کو اپنا سرمایہ حیات سمجھتا ہے۔/۹۸۸/ن۹۴۰/