انسانی حقوق کی امریکی تنظیموں نے تارکین وطن کے بارے میں ٹرمپ انتظامیہ کی نئی پالیسیوں کے خلاف عدالت میں کیس دائر کردیا ہے۔ رسا نیوز ایجنسی کی رپورٹ کے مطابق، سن فرانسسکو کی عدالت میں دائر کیے جانے والے اس کیس میں تارکین وطن کے خلاف ٹرمپ انتظامیہ کے تازہ اقدامات کو روکنے کا مطالبہ کیا گیا ہے۔
امریکہ کی شہری حقوق کی تنظیموں کے اتحاد اور بنیادی حقوق مرکز کی جانب سے دائر کی جانے والی اس شکایت میں تارکین وطن پر عائد کی جانے والی تازہ پابندیوں کی شدید الفاظ میں مذمت کی گئی ہے۔
شہری حقوق کی تنظیموں کے اتحاد کے جاری کردہ بیان میں کہا گیا ہے کہ تارکین وطن کے لیے کام کرنے والی بہت سی غیر سرکاری تنظیموں نے بھی صدر ٹرمپ کی پالیسیوں کے خلاف درخواستیں سن فرانسسکو کی عدالت کو ارسال کردی ہیں ۔
اقوام متحدہ کے ادارہ پناہ گزیناں نے بھی ٹرمپ انتظامیہ کی نئی امیگریشن پالیسیوں پر سخت تشویش کا اظہار کیا ہے۔امریکی ایوان نمائندگان کی سربراہ نینسی پیلوسی نے کہا ہے کہ ٹرمپ انتظامیہ نے تارکین وطن کے حوالے سے اپنے قانونی اختیارات سے تجاوز کیا ہے۔ /۹۸۸/ ن