مسلمان کسی قیمت پر بھی ملک نہیں چھوڑیں گے

رسا نیوز ایجنسی کی رپورٹ کے مطابق، مجلس اتحاد المسلمین کے سربراہ اسد الدین اویسی نے گذشتہ روز صحافیوں سے گفتگو کرتے ہوئے کہا: چاہے جو بھی ہو جائے مسلمان کسی قیمت پر ہندوستان نہیں چھوڑیں گے ۔

انھوں نے یہ کہتے ہوئے کہ مسلمان، سنگھ پریوار اور دیگر فاشسٹوں کی تلخ زبان اور پالیسیوں کے سامنے نہیں جھکیں گے کہا : وہ یہیں پر ایک قابل فخر ہندوستانی کی طرح رہیں گے ۔

حیدرآباد کے رکن پارلیمنٹ نے اس بات کی جانب اشارہ کرتے ہوئے کہ ملک کے مسلمان ، ہندوستان کے آئین میں حاصل اپنے حقوق، انصاف اور لازمی حصے کے لئے اپنی جمہوری جد و جہد جاری رکھیں گے کہا: جب تک زمین پر حیات ہے ، مسلمان ہندوستان میں قابل فخر ہندوستانی کی طرح رہیں گے ۔

مجلس اتحاد المسلمین پارٹی کے سربراہ نے یہ بیان کرتے ہوئے کہ ہندوستانی مسلمان یقینا اپنے حقوق کے لئے جد و جہد کرتے رہیں گے کہا: ان حقوق کو کوئی بھی چھین نہیں سکتا کیونکہ اس کی ضمانت آئین دیتا ہے ۔

اسد الدین اویسی نے اس بات کی جانب اشارہ کرتے ہوئے کہ ہم پیدائش سے ہی نہیں بلکہ انتخاب سے بھی ہندوستانی ہیں ہم نے بہت مصیبتیں دیکھی ہیں ، کئی فسادات دیکھے ہیں ، ہم نے بابری مسجد کو شہید ہوتے ہوئے بھی دیکھا ہے کہا : ہندوستانی مسلمانوں کو ہمیشہ برسراقتدار پارٹیوں سے شکایت رہی ہے کیونکہ ان سیاسی جماعتوں نے مسلمانوں کو آئین میں انھیں حاصل حقوق نہیں دیئے -

انھوں نے کہا: اس سب کے باوجود یہ ہمارا ملک ہے، ہم لڑائی جاری رکھیں گے، ہم جد و جہد جاری رکھیں گے اور یقینا اپنا حقوق حاصل کریں گے ۔