رسا نیوز ایجنسی کی رپورٹ کے مطابق مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے بیان کیا : ملکی اور بین الاقوامی سطح پر ہونے والی استعماری سازشوں کے پیش نظر عصر حاضر میں عزادای امام حسین (ع) اوجب ترین عبادت ہے۔
انہوں نے زور دیتے ہوئے کہا : عزاداری پر پابندی لگانے کا خواب دیکھنے والے سن لیں کہ امسال چہلم امام حسین (ع) کے موقع پر جلوس ہائے عزا پہلے سے کہیں زیادہ جوش و خروش اور کربلائی عزم کے ساتھ نکالے جائیں گے۔
انہوں نے یوم شہادت امام زین العابدین (ع) کی مناسبت سے شکریال میں نکالے گئے ماتمی جلوس کے آغاز پر منعقدہ مجلس عزا سے خطاب کرتے ہوئے وجاحت کی : تاریخ شاہد ہے کہ پیغام کربلا کو نہ کبھی پہلے محدود کیا جاسکا اور نہ ہی آئندہ کوئی ایسی سازش کامیاب ہوگی، ہر دور میں کربلا کے پیروکاروں نے خون کے دریا عبور کر کے پیغام کربلا کو زندہ رکھا، انشاءاللہ کربلائے عصر میں بھی حسینی پروانے اپنے خون کا نذرانہ دیکر طاغوتی سازشوں کا راستہ روکیں گے۔
ایم ڈبلیو ایم کے مرکزی سیکرٹری جنرل نے بیان کیا : عشرہ محرم الحرام کے دوران استعمار کے گماشتوں نے اسلامی جمہوریہ پاکستان کا امن تہہ و بالا کرنے کی مذموم سازشیں کیں، کراچی میں محرم الحرام سے قبل اور محرم کے دوران عزاداروں اور عزاداری کے پروگراموں پر حملے کئے، لیکن انکے مذموم عزائم پورے نہ ہوسکے۔
علامہ ناصر عباس جعفری نے کہا : یوم عاشورہ کو سانحہ راجہ بازار راولپنڈی کی آڑ میں جلاؤ گھیراؤ کی پالیسی اپنائی گئی، جس کے نتیجے میں راولپنڈی، ملتان، چشتیاں اور ہارون آباد سمیت ملک کے مختلف علاقوں میں مساجد اور امام بارگاہ نذر آتش ہوئے، علم پاک جلائے گئے اور ہمارے مقدسات کی بے حرمتی کی گئی، ستم ظریفی یہ ہے کہ حکومت اور حکومتی اداروں نے شدت پسند تکفیریوں کا راستہ روکنے کے بجائے انکے سرپرست بن گئے، آج حکومتی سطح پر انہیں خوش کرنے کیلئے میلاد النبی اور عزاداری سیدالشہداء کے جلوسوں کو محدود کرنے کی سازشیں کی جا رہی ہیں ۔
پاکستان کے بزرگ عالم دین نے کہا : ہم عزاداری پر پابندی سمیت دہشت گردوں کی حوصلہ افزائی کا موجب بننے والا کوئی بھی حکومتی فیصلہ قبول نہیں کریں گے۔ ہم نے ظالم کے خلاف ڈٹ جانے کا درس شہدائے کربلا سے لیا ہے اور انشاءاللہ انہیں کی راہ پر چلتے ہوئے میدان میں حاضر رہ کر یزیدان عصر کا مقابلہ کریں گے۔